టోక్యో ఒలింపిక్స్ రెండో రోజునే భారత్ కు సిల్వర్ మెడల్ అందించి యావత్ దేశాన్ని సంతోషంలో ముంచెత్తిన వెయిట్ లిఫ్టర్ మీరాబాయి చాను ప్రస్తుతం స్వగ్రామంలో పలు కార్యక్రమాల్లో పాల్గొంటోంది. తాజాగా..150 మంది ట్రక్ డ్రైవర్లు, క్లీనర్లకు ఆమె చిరు కానుక అందించింది.
మీరాబాయి చాను స్వగ్రామం నాంగ్పోక్ కాక్చింగ్. మణిపూర్ రాజధాని ఇంఫాల్ కు 25 కిలోమీటర్ల దూరంలో ఉంటుంది. అయితే.. చాను ప్రతిరోజూ ప్రాక్టీసు కోసం 25 కిలోమీటర్ల దూరంలో ఉన్న స్పోర్ట్స్ అకాడమికి వెళ్లి వచ్చేది. ఈ క్రమంలో ఆమె డబ్బులు లేక తమ గ్రామం నుంచి నగరానికి వెళ్లే ఇసుక లారీలను ఆశ్రయించేది. ఆ లారీలు, ట్రక్కుల డ్రైవర్లు, క్లీనర్లు డబ్బులు తీసుకోకుండా చానును ఉచితంగా ఎక్కించుకుని ఇంఫాల్ వరకు తీసుకువెళ్లేవాళ్లు. టోక్యో ఒలింపిక్స్ ముందు వరకు చాను ప్రాక్టీసు ఆ విధంగానే సాగింది.
తాను సిల్వర్ మెడల్ సాధించడంలో ఈ ట్రక్ సిబ్బంది సాయం కూడా ఉందని భావించిన చాను వారిని ప్రత్యేకంగా ఆహ్వానించి విందు ఏర్పాటు చేసింది. అంతేకాదు.. ప్రతి ఒక్కరికీ ఒక షర్టు, మణిపురి స్కార్ఫ్ ను కానుకగా ఇచ్చి వారి పట్ల తన కృతజ్ఞతను చాటుకుంది.
